Pagkaalaot mo Higala ko.

Sayo sa buntag patid-sikad ang imong pamahaw
Hinungdan sa kalit nga ikaw milakaw
Didto sa kadalanan diin ikaw naglatagaw
Namasin sa mga basurahan makapunit og bahaw!

Kuhit diri, kuhit didto
Nagpakilooy intawon ang higala ko
Adunay higayon nga dukol ang nadawat mo
Hinungdan sa pagkabangog sa imong ulo!

Kadaghanan nila ikaw ginaabog
Igo lang sila kanimo nagpaibog
Gihulat mo bisan ang katapusang bukog
Tambal sa nagkotoy mong tiyan aron og mabusog!

Mipauli ka sa inyo nga nagkabulingit
Gitutokan ka nila sama sa hinagiban nga mahait
Dungan lapdos sa bangko og ikaw mityabaw sa kasakit
Og ikaw nagping-it didto sa kangitngit!

Sa dihang nahinanok na sa paghikatulog ang tanan
Kalit ikaw mitoyhakaw og sa kusina midagan
Mipaingon ka sa usa ka kaldero og giablihan
Oy, humba man diay pastilan pagkabulahan!

Apan mao nalang ang imong namat-an
Usa ka makusog nga bunal sa ulo imong nahiaguman
Igo ka na lang sa pagpaghot sa sakit nga natagamtaman
Pagkaalaot mo higala ko’ng IRO nga among silingan!